काठमाडौं,
संयुक्त राष्ट्रसंघको अनुरोधमा शान्ति स्थापनार्थ युनाइटेड नेशन्स मिसन
इन साउथ सुडान (जुवा) मा नेपाल एफपीयु वानको रुपमा खटिएर सफलतापूर्वक
आफ्नो कार्यकाल सम्पन्न गरी स्वदेश फर्किएको टोलीलाई बैशाख १४ गते
सशस्त्र प्रहरी अतिरिक्त महानिरीक्षक रामशरण पौडेलले सशस्त्र प्रहरी बल
नेपाल नम्बर २० गण विपद उद्वार उपत्यका सिनामंगलमा आयोजित एक समारोह बीच
हार्दिक स्वागत गर्नुभयो ।
त्यसअवसरमा उहाँले द्वन्दग्रस्त मुलुकमा खटिएर विश्व शान्ति स्थापना
गर्ने जस्तो विशेष जिम्मेवारी सफलतापूर्वक सम्पन्न गरी स्वदेश
र्फिर्कएकोमा सशस्त्र प्रहरी कर्मचारीहरुलाई हार्दिक बधाई दिनुहुँदै
मिसनमा कार्यरत रहँदा उहाँहरुले आर्जन गरेको ज्ञान, कला र सिपलाई
स्वदेशमा समेत उपयोग गर्नुपर्नेमा जोड दिनुुभयो ।
सशस्त्र प्रहरी अतिरिक्त महानिरीक्षक रामशरण पौडेलले संगठनमा आवद्ध रही
संयुक्त राष्ट्रसंघीय मिशनमा सेवा गर्न पाउनु विशेष अवसरको रुपमा रहेको
चर्चा गर्नुहुँदै सशस्त्र प्रहरी कर्मचारीहरु हरहमेसा राज्यप्रदत्त
जिम्मेवारीका क्षेत्रहरुमा फौजी अनुशासनमा रहेर सामुहिक भावनकासाथ
आ-आफ्नो जिम्मेवारी निर्वाहमा सदैव कृयाशिल रहनुपर्ने बताउनुभयो ।
सशस्त्र प्रहरी नायब उपरीक्षक खेमराज ठगुन्नाको कमाण्डमा स्वदेश
फर्किएको सो टोलीमा सशस्त्र प्रहरी अधिकृत, विल्लादार तथा जवानहरु गरी
कूल १ सय ६२ जना रहेका छन् ।
कार्यक्रममा सशस्त्र प्रहरी बल नेपाल नम्बर ९ पशुपतिनाथ बाहिनी मुख्यालय
काठमाडौंका बाहिनीपति सशस्त्र प्रहरी नायव महानिरीक्षक बंशिराज दाहाल
लगायत सशस्त्र प्रहरी बल नेपालका बरिष्ठ अधिकृत तथा विल्लादार जवानहरुको
उपस्थिती रहेको थियो ।
