समाचार

काठमाडौ, सशस्त्र प्रहरी परिवार महिला संघकी अध्यक्ष श्रीमती सरिता कणेल खनालले बिहीबार नेपाल एपीएफ अस्पतालमा आयोजित एक कार्यक्रमका बीच महिला स्वास्थ्य सम्बन्धि कल्याणकारी योजनाको शुभारम्भ गर्नुभएको छ । सो अवसरमा उहाँले उक्त कल्याणकारी योजनाको अफिस, महिलाको पाठेघर सम्बन्धि विविध स्वास्थ्य जाँचमा प्रयोगमा आउने उपकरण तथा ‘भी.आई.ए., भी.आई.एल.आई. जाँच, रोगको पहिचान तथा उपचार तालिम’को समुद्घाटन गर्नुभयो । संघकी अध्यक्ष श्रीमती सरिता कणेल खनालले महिलाहरुको पाठेघरको उपचारमा सहयोग पुग्ने आधुनिक उपकरण खरिद वापत लागेको रु पाँच लाख बराबरको चेक त्यसैअवसरमा एपीएफ अस्पताललाई सहयोग रुवरुप हस्तान्तरण गर्नुभयो । सोअवसरमा संघकी अध्यक्ष खनालले उपचारत बिरामीको स्वास्थ्य अवस्थाबारे जानकारी लिनुकासाथै महिला बिरामीहरुलाई फलफुल वितरण गर्नुभयो । देशभरका आर्थिक अवस्था कमजोर भएका पाठेघर सम्बन्धि समस्या भोगिरहेका दिदीबहिनीहरुको उपचारको लागि सशस्त्र प्रहरी परिवार महिला संघको सिफारिसमा नेपाल एपीएफ अस्पतालमा पाठेघरको क्यान्सरको पहिचान तथा उपचारमा सहयोग पु¥याउने उद्देश्यकासाथ सो संघले उक्त योजना कार्यान्वयनमा ल्याएको हो । कार्यक्रममा नेपाल एपीएफ अस्पतालका प्रमुख प्राविधिक सशस्त्र प्रहरी बरिष्ठ उपरीक्षक डा. रुपक महर्जनले धन्यवाद ज्ञापनको क्रममा कोभिड–१९ महामारी पीडितको उपचारमा अस्पतालले प्रदान गरेको सेवाको विभिन्न क्षेत्रहरुबाट प्रशंसा भएको चर्चा गर्नुहुँदै अस्पतालमा थप भएको आधुनिक उपकरणहरुको प्राप्तीसँगै राष्ट्रसेवक सशस्त्र प्रहरी कर्मचारीहरु, उनीहरुका आश्रित परिवार, स्थानीय सर्वसाधारण नागरिक तथा मानव सेवा आश्रमका बेसहारा, अशक्त, असहाय एवं अभिभावक विहिनहरुको निःशुल्क उपचारमा महत्वपूर्ण सहयोग पुग्ने बताउनुभयो । वि.सं. २०५९ साल असार १७ गते स्थापना भएको सशस्त्र प्रहरी परिवार महिला संघ निःस्वार्थ सेवा भावकासाथ समाज सेवाको क्षेत्रमा निरन्तर क्रियाशील रहँदै सिमान्तकृत तथा पिछडीएका क्षेत्रका बालबालिकाहरुको निःशुल्क अध्ययन, जेहेन्दार छात्रछात्राहरुलाई छात्रबृत्ति प्रदान, विपद् प्रकोप पिडीतहरुलाई राहत वितरण, देशका विभिन्न ठाउँहरुमा स्वास्थ्य शिविर संचालन, राष्ट्रसेवक सशस्त्र प्रहरी कर्मचारीका श्रीमतीहरुलाई स्वरोजगारमूलक तालिम प्रदान, जनचेतनामुलक कार्यक्रम, रक्तदान लगायत बागमती सरसफाई महाअभियानमा सहभागिता जनाउँदै आफ्नो क्षमताले भ्याएसम्म संघको उद्देश्य प्राप्तीमा निरन्तर कृयाशिल रहेको छ ।

काठमाडौ, नेपाली आर्मी वार कलेज नगरकोटमा संचालित ‘सि.सं. १० हाईअर कमाण्ड एण्ड म्यानेजमेन्ट कोर्स’का उच्च अधिकृतहरुले बिहीबार सशस्त्र प्रहरी बल नेपाल प्रधान कार्यालयको स्थलगत अवलोकन भ्रमण गरी सशस्त्र प्रहरी बल, नेपालबारे विविध जानकारी लिनुभयो । सो अवसरमा शिक्षार्थी अधिकृतहरुसँगको अन्तरक्रिया कार्यक्रममा सशस्त्र प्रहरी महानिरीक्षक शैलेन्द्र खनालले सशस्त्र प्रहरी बल, नेपाल आफ्नो स्थापना कालदेखि नै राष्ट्रको सुरक्षा, राष्ट्रियताको जगेर्ना र आम नागरिकको सेवा, सुरक्षा तथा उद्वार कार्यमा कटिबद्ध भई कार्यक्षेत्रमा अहोरात्र क्रियाशील रहँदै उत्कृष्ट कार्यसम्पादन गर्दै आईरहेको उल्लेख गर्नुहुँदै राज्यप्रदत्त विविध जिम्मेवारी निर्वाहको क्रममा सुरुवात देखि नै विविध तालिम तथा साधनश्रोत व्यवस्थापनमा नेपाली सेनाबाट महत्वपूर्ण सहयोग प्राप्त भईरहेको उल्लेख गर्नुभयो । उहाँले यस खालका अन्तरक्रिया तथा भ्रमणले एक आपसमा सुमधुर सम्बन्ध कायम राख्दै आगामी दिनहरुमा कार्यक्षेत्रमा कार्यसम्पादन गर्ने क्रममा सहजता आउने विश्वास व्यक्त गर्नुुहुँदै राष्ट्र र आम नागरिकको सुरक्षा, विपद् व्यवस्थापन तथा पीडितको उद्वार लगायतका कार्यहरु सबैको सामूहिक प्रयासले विशिष्ट तवरले सम्पादन गर्न सकिने बताउनुभयो । महानिरीक्षक खनालले नेपाली सेनामा विभिन्न तालिममा आफू सहभागी हुँदाको अनुभव स्मरण गर्नुुहुँदै भविष्यमा नेतृत्व तहमा पुग्ने उच्च अधिकृतहरुले यस्ता उच्चस्तरीय कोर्सबाट प्राप्त गर्ने ज्ञान तथा अनुभवले भविष्यमा आईपर्न सक्ने जस्तोसुकै सुरक्षा चुनौतीहरुलाई समेत परास्त गर्दै नेपाल सरकारको लक्ष्य प्राप्तिमा समेत उल्लेखनीय भूमिका निर्वाह गर्ने बताउनुभयो । सशस्त्र प्रहरी अतिरिक्त महानिरीक्षक पुष्पराम के.सी.ले सशस्त्र प्रहरी बल नेपालको बारेमा शिक्षार्थी अधिकृतहरुले राखेको विविध जिज्ञासाहरुबारे प्रष्ट पार्नुभयो । त्यसैअवसरमा उहाँले उक्त तालिमका सिनियर ईन्स्ट्रक्टर सहायक रथी प्रेमध्वज अधिकारीलाई मायाको चिनो प्रदान गर्नुभयो । सशस्त्र प्रहरी नायव महानिरीक्षक राजु अर्यालले स्वागत मन्तव्यको क्रममा यस्ता भ्रमण तथा अन्तरक्रियाबाट सुरक्षा निकायहरुले एक आपसमा भएका अनुभव आदान प्रदान गर्ने मौकाको साथै कार्यसम्पादनको क्रममा स्पष्टताकासाथ समन्वय र सहकार्यमा सघाउ पुर्‍याउने बताउनुभयो । सशस्त्र प्रहरी बल नेपालको पृष्ठभूमि, परिचालन, सांगठनिक संरचना, सुरक्षा संगठनहरुबीच समन्वयका क्षेत्रहरु, विद्यमान विविध चुनौती लगायतका विविध विषयहरुबारे शिक्षार्थी अधिकृतहरु समक्ष प्रस्तुतीकरण मार्फत कायम मुकायम सशस्त्र प्रहरी बरिष्ठ उपरीक्षक अन्जनी कुमार पोखरेल र सशस्त्र प्रहरी उपरीक्षक विष्णुप्रसाद भट्टले जानकारी गराउनुु भएको थियो । त्यसअवसरमा विपद् व्यवस्थापनमा सशस्त्र प्रहरी बल, नेपालले प्रयोगमा ल्याएको विविध सामाग्रीको अवलोकन गर्नुकासाथै सशस्त्र प्रहरी बल, नेपाल प्रधान कार्यालयस्थित केन्द्रीय आदेश कक्षको कामकारवाही तथा सो कक्षले हाल प्रयोगमा ल्याईरहेको सूचना तथा संचार प्रविधिबारे समेत शिक्षार्थी अधिकृतहरुले जानकारी हासिल गर्नुभयो । कार्यक्रममा सशस्त्र प्रहरी अतिरिक्त महानिरीक्षक रामशरण पौडेल लगायत नेपाली सेना र सशस्त्र प्रहरी बल, नेपालका उच्च अधिकृतहरुको उपस्थिति रहेको थियो ।

काठमाडौ, सर्लाही जिल्लाको हरिवन नगरपालिका ११ स्थित बासाटोलबाट असोज १२ गते सशस्त्र प्रहरीले करीव १ लाख ७३ हजार रुपैयाँ बराबरको चोरीपैठारीको लत्ताकपडा तथा चुरा बरामद गरेको छ । सशस्त्र प्रहरी बल नेपाल सुरक्षा वेश हरिवनबाट खटिएको सशस्त्र प्रहरीले एक यात्रुवाहक बसमा चेकजाँच गर्ने क्रममा उक्त सामान बरामद गरेको हो । बरामद सामान स्थानीय भन्सार कार्यालयमा बुझाएको छ । यसैगरी सशस्त्र प्रहरी बल नेपाल बोर्डर आउट पोष्ट अलौबाट खटिएको सशस्त्र प्रहरीले असोज १२ गते करीव १ लाख रुपैयाँ बराबरको चोरीपैठारीको लत्ताकपडा बरामद गरेको छ । भारतबाट अवैध रुपले ६ वटा साइकलमा राखेर ल्याउँदै गरेको उक्त सामान सशस्त्र प्रहरीले पर्सा जिल्लाको विरगंज महानगरपालिका १७ स्थित सीमा ईलाकाबाट बरामद गरेको हो । त्यसबेला उक्त सामान ल्याउदै गरेका ब्यक्तिहरु गस्तिमा रहेको सशस्त्र प्रहरीलाई टाढैबाट देखि भागी फरार भएका थिए । उक्त ६ वटै साइकल समेत बरामद गरिएकोे छ । बरामद लत्ताकपडा तथा साइकल विरगंज भन्सार कार्यालयमा बुझाएको छ । यसैगरी सशस्त्र प्रहरी बल नेपाल बोर्डर आउट पोष्ट गौरबाट खटिएको सशस्त्र प्रहरीले असोज १३ गते करीव १ लाख ७२ हजार रुपैयाँ बराबरको चोरीपैठारीको छालाको जुत्ता तथा स्याण्डल बरामद गरेको छ । भारतबाट अबैध रुपले ल्याउँदै गरेको उक्त सामान सशस्त्र प्रहरीले रौतहट जिल्लाको गौर नगरपालिका २ महादेवपट्टी स्थित सीमा ईलाकाबाट बरामद गरेको हो । बरामद सामान भन्सार कार्यालय गौरमा बुझाईएको छ ।

सर्लाही, विभिन्न किसिमका लागूऔषधसहित सशस्त्र प्रहरीले सर्लाही जिल्लाको मलंगवा नगरपालिका ९ स्थित सीमा ईलाकाबाट असोज १२ गते एक जनालाई पक्राउ गरेको छ । सशस्त्र प्रहरी बल नेपाल बोर्डर आउट पोष्ट मलंगवाबाट खटिएको सशस्त्र प्रहरीले सर्लाही जिल्लाको कौडेना गाउँपालिका १ बस्ने २४ वर्षिय जितेन्द्र साहलाई शंका लागि जाँच गर्दा उनको साथमा नाइट्राजेपाम ७ सय ८० वटा, डाईजाल्याप २० वटा र नोफिन ९ वटा फेला पारेपछी उनलाई पक्राउ गरेको हो । पक्राउ परेका साहलाई बरामद लागूऔषधसहित आवश्यक कारवाहीको लागि नेपाल प्रहरीलाई बुझाईएको छ ।

काठमाडौ, महोत्तरी जिल्लाको सम्सी गाउँपालिका ६ स्थित सम्सी चोकबाट असोज १० गते सशस्त्र प्रहरीले करीव २ लाख ४१ हजार रुपैयाँ बराबरको चोरीपैठारीको लत्ताकपडा, किराना, औषधी तथा मेशिनरी सामान बरामद गरेको छ । भारतबाट अबैध रुपले ल्याउँदै गरेको उक्त सामान सशस्त्र प्रहरी बल नेपाल बोर्डर आउट पोष्ट सम्सीबाट खटिएको सशस्त्र प्रहरीले बरामद गरेको हो । बरामद सामान जलेश्वर भन्सार कार्यालयमा बुझाईएको छ । यसैगरी सशस्त्र प्रहरी बल नेपाल नम्बर ३५ गण कञ्चनपुरबाट खटिएको सशस्त्र प्रहरीले असोज ११ गते करीव २ लाख ९७ हजार रुपैयाँ बराबरको चोरीपैठारीको लत्ताकपडा बरामद गरेको छ । भारतबाट अवैध रुपले ल्याउँदै गरेको उक्त लत्ताकपडा कञ्चनपुर जिल्लाको लालझाडी गाउँपालिका ६ चानदेउ सीमा ईलाकाबाट बरामद गरी भन्सार कार्यालय गड्डाचौकीमा बुझाईएको छ । त्यसैगरी पर्सा जिल्लाको विरगंज महानगरपालिका १६ ईनर्वा सीमा ईलाकाबाट असोज ११ गते करीव १ लाख ५ हजार रुपैयाँ बराबरको चोरीपैठारीको कस्मेटिक तथा किराना सामान सशस्त्र प्रहरी बल नेपाल नम्बर १३ गण पर्साबाट खटिएको सशस्त्र प्रहरीले बरामद गरेको छ । बरामद लत्ताकपडा भन्सार कार्यालय विरगंजमा बुझाईएको छ ।

काठमाडौ, पूर्वी नवलपरासी जिल्लाको विनय त्रिवेणी गाउँपालिका ७ स्थित गण्डक प्रोजेक्टको स्टोरमा असोज १० गते भएको आगलागि सशस्त्र प्रहरी, नेपाल प्रहरी र स्थानीय वासिन्दाले दमकलको सहयोगमा नियन्त्रण ल्याएको छ । सो स्टोरमा आगलागी हुँदा करीव १ करोड ९२ लाख रुपैयाँ बराबरको मेशिनरी सामान जलेर नष्ट भएको बताईएको छ । सो आगलागी बारे जानकारी पाउनासाथै सशस्त्र प्रहरी बल नेपाल बोर्डर आउट पोष्ट विनय त्रिवेणीबाट खटिएको सशस्त्र प्रहरी उक्त आगलागी नियन्त्रणमा सकृयतासाथ जुटेको हो ।

झापा, झापा जिल्लाको मेचीनगर नगरपालिका ४ प्रसादगौंडा ईलाकाबाट भाद्र ६ गते सशस्त्र प्रहरीले करीव ७ लाख १० हजार रुपैयाँ बराबरको चोरीपैठारीको लत्ताकपडा बरामद गरेको छ । भारतबाट अवैध रुपले ल्याउँदै गरेको उक्त लत्ताकपडा सशस्त्र प्रहरी बल नेपाल बोर्डर आउट पोष्ट बाहुनडाँगीबाट खटिएको सशस्त्र प्रहरीले बरामद गरेको हो । बरामद लत्ताकपडा भन्सार कार्यालय काँकडभिट्टामा बुझाईएको छ ।

काठमाडौं, विभिन्न किसिमका लागूऔषधसहित सशस्त्र प्रहरीले रुपन्देही जिल्लाको रोहिणी गाउँपालिका ५ स्थित मज्नुचौरा ईलाकाबाट असोज ७ गते दुई जनालाई पक्राउ गरेको छ । पक्राउ पर्नेहरुमा नवलपरासी जिल्लाको रामग्राम नगरपालिका १६ लालपाती बस्ने १९ वर्षिय ईश्लाम चुरियार र २० वर्षिय आलमविर चुरियार छन् । लु ४ प ११३४ नम्बरको मोटरसाईकलमा सवार उनीहरुलाई सशस्त्र प्रहरी बल नेपाल बोर्डर आउट पोष्ट बुचीबाट खटिएको सशस्त्र प्रहरीले शंका लागि जाँच गर्दा उनीहरुको साथमा फेनारगन ३ सय ५ वटा, डाईजोपाम २ सय ८१ वटा र नोफिन ३ सय १६ वटा फेला पारको हो । त्यसवेला उनीहरुले प्रयोग गरेको उक्त मोटरसाईकल समेत बरामद गरिएको छ । पक्राउ परेका दुवै जनालाई बरामद लागूऔषध तथा मोटरसाईकलसहित आवश्यक कारवाहीको लागि नेपाल प्रहरीलाई बुझाईएको छ । यसैगरी सशस्त्र प्रहरी बल नेपाल फरवार्ड सुरक्षा वेश अर्नाहाबाट खटिएको सशस्त्र प्रहरीले १ सय १ बोतल डाईलेक्स नामक लागुऔषधसहित सर्लाही जिल्लाको बलरा नगरपालिका ५ अर्नाहास्थित सीमा ईलाकाबाट सोही नगरपालिका १० बस्ने ४० वर्षिय मल्कित रायलाई पक्राउ गरेको छ । भारतबाट नेपालतर्फ आउँदै गरेका निज रायलाई गस्तीमा खटिएको सशस्त्र प्रहरीले जाँच गर्दा उनको साथमा उक्त लागूऔषध फेला परेको हो । पक्राउ परेका रायलाई बरामद लागूऔषसहित आवश्यक कारवाहीको लागि नेपाल प्रहरीलाई बुझाईएको छ ।

काठमाडौ, नेपाली सेना सैनिक वार कलेजमा संचालित ‘सि.सं. ३ अल आम्र्स कमाण्ड तथा स्टाफ तालिम’का शिक्षार्थी अधिकृतहरुले बिहिबार सशस्त्र प्रहरी बल नेपाल प्रधान कार्यालयको अवलोकन भ्रमण गरी सशस्त्र प्रहरी बल नेपालबारे विविध जानकारी लिएका छन् । सो अवसरमा सशस्त्र प्रहरी अतिरिक्त महानिरीक्षक रामशरण पौडेलले सशस्त्र प्रहरी बल नेपाल राज्य प्रदत्त जिम्मेवारी निर्वाहमा कार्यक्षेत्रमा निरन्तर क्रियासिल रहिरहेको उल्लेख गर्नुहँुदै जिम्मेवारी निर्वाहको क्रममा नेपाली सेना लगायत सम्वद्ध अन्य निकायहरुसँग समेत समन्वय तथा सहकार्य गर्दै राष्ट्रको सुरक्षा र आम नागरिकको सेवा तथा सुरक्षामा कटिवद्ध भई अहोरात्र परिचालन भईरहेको बताउनुभयो । उहाँले यस खालका अवलोकन तथा भ्रमणले कार्यक्षेत्रमा कार्यसम्पादन गर्ने क्रममा महत्वपूर्ण सहयोग पुग्ने उल्लेख गर्नुुहुँदै शान्ति सुरक्षा, सीमा सुरक्षा, विपद् व्यवस्थापन लगायतका कार्यहरुमा सम्वद्ध सबैको समन्वय तथा सामुहिक प्रयासले महत्वपूर्ण भूमिका निर्वाह गर्न सकिने बताउनुभयो । सशस्त्र प्रहरी अतिरिक्त महानिरीक्षक पौडेलले भविष्यमा समेत समन्वय, सहकार्य र यस्ता भ्रमण निरन्तर रुपमा संचालन हुने विश्वास व्यक्त गर्नुहुँुदै शिक्षार्थी अधिकृतहरुलाई तालिम सफलताको शुभकामना समेत व्यक्त गर्नुभयो । सोही अवसरमा सशस्त्र प्रहरी अतिरिक्त महानिरीक्षक पौडेलले उक्त तालिमका डाईरेक्टिङ्ग स्टाफ प्रमुख सेनानी जितबहादुर लामालाई मायाको चिनो प्रदान गर्नुभयो । भ्रमणको क्रममा शिक्षार्थी अधिकृतहरुले सशस्त्र प्रहरी बल नेपालबारे राखेको विविध जिज्ञासाबारे सशस्त्र प्रहरी नायव महानिरीक्षक गणेश ठाडा मगरले प्रष्ट पार्नुभयो । सशस्त्र प्रहरी बल नेपालको पृष्ठभूमि, परिचालनका क्षेत्रहरु, सांगठानिक संरचना, सुरक्षा चुनौती लगायतका विविध विषयहरुमा प्रस्तुतीकरण मार्फत सशस्त्र प्रहरी उपरीक्षक विष्णुप्रसाद भट्टले जानकारी गराउनुु भएको थियो । त्यसअवसरमा शिक्षार्थी अधिकृतहरुले विपद् व्यवस्थापनमा सशस्त्र प्रहरी बल नेपालले प्रयोगमा ल्याएको विविध सामाग्रीको अवलोकन गर्नुकासाथै सशस्त्र प्रहरी बल नेपाल प्रधान कार्यालयस्थित केन्द्रिय आदेश कक्षको कामकारवाही तथा हाल प्रयोगमा ल्याईरहेको सूचना तथा संचार प्रविधिबारे समेत जानकारी हासिल गरेका छन् ।

कञ्चनपुर, कञ्चनपुर जिल्लाको बेदकोट नगरपालिका १० स्थित दैजी बेलडाँडी नहरमा डुबेर बेपत्ता भएका एक जनाको शव सशस्त्र प्रहरीले भाद्र ३१ गते फेला पारेको छ । सोही ठाउँको सिद्धपुर बस्ने ३५ बर्षिय लक्ष्मण पन्त यहि भाद्र ३० गते नुहाउने क्रममा उक्त नहरमा डुुबेर बेपत्ता भएको बताईएको छ । सशस्त्र प्रहरी बल नेपाल नम्बर ३५ गणबाट उनको खोजी तथा उद्वारमा खटिएको सशस्त्र प्रहरीले उनको शव फेला पारेको हो ।

पर्सा, पर्सा जिल्लाको विरगंज महानगरपालिका २५ स्थित खलबु टोलबाट भाद्र ३० गते सशस्त्र प्रहरीले २ सय २५ वटा नाईट्राभेट ट्याब्लेटसहित एक जनालाई पक्राउ गरेको छ । पक्राउ पर्नेमा मकवानपुर जिल्लाको हेटौंडा उपमहानगरपालिका २२ पदमपोखरी बस्ने २४ बर्षिय सरोज लामा छन् । उनलाई सशस्त्र प्रहरी बल नेपाल बोर्डर आउट पोष्ट ड्राईपोटबाट खटिएको सशस्त्र प्रहरीले शंका लागि जाँच गर्दा उनको साथमा उक्त लागुऔषध फेला परेको हो । पक्राउ परेका निज लामालाई बरामद लागुऔषधसहित आवश्यक कारबाहीका लागि नेपाल प्रहरीलाई बुझाईएको छ ।

काठमाडौं, काठमाडौं महानगरपालिका १५ सितापाईलास्थित एक रेष्टुरेन्टबाट भाद्र ३० गते सशस्त्र प्रहरीले ९ एमएमको पेस्तोल १ नाल तथा सोको ५ वटा गोलीसहित एक जनालाई पक्राउ गरेको छ । फक्राउ पर्नेमा काठमाडौं जिल्लाको तार्केश्वर नगरपालिका ३ जितपुर बस्ने २४ वर्षिय सोनाम तामाङ्ग छन् । उनलाई सशस्त्र प्रहरी बल नेपाल नम्बर १९ गण (विशेष कार्यदल) बंगलामुखी काठमाडौमा खटिएको सशस्त्र प्रहरीले विशेष सूचनाको आधारमा निजलाई उक्त पेस्तोल तथा गोली र निजले प्रयोग गरेको मोटरसाईकलसहित पक्राउ गरेको हो । पक्राउ परेका तामाङ्गलाई बरामद पेस्तोल, गोली तथा मोटरसाईकलसहित आवश्यक कारवाहीको लागि नेपाल प्रहरीलाई बुझाईएको छ ।

सुनसरी, सुनसरी जिल्लाको कोशी गाउँपालिका ८ स्थित पूर्व पश्चिम लोकमार्गबाट भाद्र २९ गते सशस्त्र प्रहरीले करीब १ लाख ७१ हजार रुपैयाँ बराबरको विभिन्न किसिमका औषधी बरामद गरेको छ । विराटनगरबाट विरगंजतर्फ जाँदै गरेको एक यात्रुवाहक बसमा राखेर लैजाँदै गरेको उक्त औषधीको बिल बिजक फेला नपरेपछि सशस्त्र प्रहरी बल नेपाल बोर्डर आउट पोष्ट विरगंजबाट खटिएको सशस्त्र प्रहरीले बरामद गरेको हो । बरामद औषधी राजस्व अनुसन्धान कार्यालय ईटहरीमा बुझाईएको छ ।

रौतहट, रौतहट जिल्लाको ईशनाथ नगरपालिका २ स्थित सीमा ईलाकाबाट भाद्र २९ गते सशस्त्र प्रहरीले करीव १ लाख ३० हजार रुपैयाँ बराबरको दुई वटा ड्रोन क्यामरा बरामद गरेको छ । नेपालबाट भारततर्फ जाँदै गरेका ब्यक्तिले सशस्त्र प्रहरी बल नेपाल बोर्डर आउट पोष्ट औरहीयाबाट खटिएको सशस्त्र प्रहरीलाई टाढैबाट देख्नासाथै उनले बोकेको झोला सोही ठाउँमा छाडी फरार भएपछी उक्त झोलामा जाँच गर्दा सो क्यामरा फेला परेको हो । बरामद क्यामरा भन्सार कार्यालय गौरमा बुझाईएको छ ।

काठमाडौ, झापा जिल्लाको गौरीगञ्ज गाउँपालिका ५ फत्तेपुरस्थित सीमा ईलाकाबाट भाद्र २८ गते सशस्त्र प्रहरीले दुई बोतल कोरेक्स तथा पाँच ग्राम गाँजासहित एक जनालाई पक्राउ गरेको छ । पक्राउ पर्नेमा सोही जिल्लाको कमल गाउँपालिका २ बस्ने ५८ बर्षिय खड्ग दाहाल छन् । मे ३ प ९८३५ नम्बरको मोटरसाईकलमा भारतबाट नेपालतर्फ आउँदै गरेका निज दाहाललाई सशस्त्र प्रहरी बल नेपाल बोर्डर आउट पोष्ट गौरीगञ्जबाट खटिएको सशस्त्र प्रहरीले जाँच गर्दा उनको साथमा उक्त लागुऔषध फेला पारेको हो । त्यसबेला उनको साथबाट एक थान मोबाईल सेट, ४ हजार ७ सय ७५ नेपाली रुपैयाँ र ७५ भारतीय रुपैयाँ समेत बरामद गरिएको छ । पक्राउ परेका दाहाललाई बरामद लागुऔषध, मोबाईल तथा रुपैयाँसहित आवश्यक कारवाहीको लागी नेपाल प्रहरीलाई बुझाईएको छ । यसैगरी सशस्त्र प्रहरी बल नेपाल बोर्डर आउट पोष्ट विरगंजबाट खटिएको सशस्त्र प्रहरीले करीब ६ के.जी. गाजाँसहित बारा जिल्लाकोे जितपुर सिमारा उपमहानगरपालिका ७ बस्ने १८ बर्षिय पवन कुमार श्रीवस्तवलाई पक्राउ गरेको छ । भारतबाट नेपालतर्फ आउँदै गरेका निज श्रीवस्तवलाई गस्तीमा खटिएको सशस्त्र प्रहरीले शंका लागी जाँच गर्दा उनको साथमा उल्लेखित परिमाणको गाजाँ फेला परेपछी उनलाई पर्सा जिल्लाको विरगंज उपमहानगरपालिका १६ शंकराचार्य गेट नजिकैबाट पक्राउ गरिएको हो । त्यसैगरी मोरङ्ग जिल्लाको विराटनगर महानगरपालिका १८ स्थित सीमा ईलाकाबाट भाद्र २८ गते सशस्त्र प्रहरीले करीव ९ के.जी. गाँजा बरामद गरेको छ । जतुवाबाट झट्याहीतर्फ आउँदै गरेको को ३३ प ६६८० नम्बरको मोटरसाईकलमा सवार व्यक्तिले सशस्त्र प्रहरी बल नेपाल बोर्डर आउट पोष्ट जहदा भुटाहाबाट खटिएको सशस्त्र प्रहरीलाई देख्नासाथै उनले बोकेको झोला सोही ठाउँमा छाडी फरार भएपछी सो झोलाभित्र जाँच गर्दा उक्त गाँजा फेला परेको हो । त्यसवेला उक्त मोेटरसाईकल समेत बरामद गरिएको छ । बरामद गाँजा तथा मोटरसाईकल नेपाल प्रहरीलाई बुझाईएको छ ।

सशस्त्र प्रहरी महानिरीक्षक शैलेन्द्र खनालले हामी सवैको सामूहिक प्रयास र भावनाले मात्र शान्ति स्थापनाको कार्यलाई मजबुत र सफल बनाउन सकिने बताउनु भएको छ । संयुक्त राष्ट्र संघको अनुरोधमा मित्रराष्ट्र चीनको सार्वजनिक सुरक्षा मन्त्रालय (Ministry Of Public Security) को आयोजनामा यही सेप्टेम्बर ८ देखि ९ सम्म भएको शान्ति स्थापना सम्बन्धी अन्तर्राष्ट्रिय अनलाईन कार्यशालालाई "सेफ्टी एण्ड सेक्युरिटी अफ युएन पिसकिपर्स" विषयमा प्रमुख वक्ता (Keynote Speaker) को रुपमा सम्बोधन गर्नु हुदैं उहाँले सो कुरा बताउनु भएको हो। महानिरीक्षक खनालले शान्ति स्थापनार्थ खटिएका कर्मचारीको सुरक्षाको लागि एम्बुस तथा माइनहरुबाट सुरक्षित रहन पर्याप्तम मात्रामा सचेतना र क्षमता अभिबृद्धि गर्नुपर्ने बताउनु हुँदैं शान्ति स्थापनार्थ परिचालन पूर्वको तालिममा यस सम्बन्धी क्षति न्यूनीकरण गर्ने उपाय बारे समेत प्रशिक्षण प्रदान गर्नुपर्ने बताउनु भयो । शान्ति मिसनको कार्यादेशलाई प्रभावकारी ढंगले पूरा गर्नको लागि फर्म्ड पुलिस युनिट र इन्डीभिजुअल पुलिस अफिसरको रुपमा खटिने सुरक्षाकर्मीको लागि खटिनु पूर्व मिसन लक्षित तालिम संचालन गर्नुपर्नेमा समेत उहाँले जोड दिनु भयो । यसरी तालिम प्राप्तव र क्षमता भएका कर्मचारीहरु श्रोत साधन सम्पन्न भई परिचालित हुँदा आफू सुरक्षित रही प्राप्त् जिम्मेवारी प्रभावकारी ढंगले पूरा गर्न सकिने बताउनु हुँदै महानिरीक्षक खनालले बदलिँदो सुरक्षा परिस्थिति र चुनौतीलाई मध्यनजर गर्दै मिसन लक्षित पूर्वतयारीले यसमा खटिने कर्मचारीको सुरक्षामा सहयोग पुग्ने बताउनु भयो । कुशल नेतृत्व¸ सामूहिक भावना र सहकार्य¸ अनुशासन¸ इमानदारी¸ सही योजना¸ समन्वय तथा कमाण्डरको क्षमता नै शान्ति स्थापनार्थ खटिएका कर्मचारीको सुरक्षाको लागि महत्वपूर्ण हुने कुरामा जोड दिनुहुँदै उहाँले संयुक्त राष्ट्र संघ र यसका सदस्य राष्ट्र्हरुको तर्फबाट गरिएका कार्यलाई सार्थक बनाउनको लागि यस प्रकारका सम्मेलन महत्वपूर्ण हुने समेत बताउनु भयो । महानिरीक्षक खनालले आफ्नो सम्बोधनको क्रममा आफू शान्ति स्थापनार्थ विश्वभका विभिन्न मुलुकमा विभिन्न जिम्मेवारीमा रही खटिएको अनुभव स्मरण गर्नुहुँदै मिसन इलाकामा प्रभावकारी इन्टेलिजेन्सको परिचालनले सम्भावित चुनौती र हुन सक्ने घटनालाई न्यूनीकरण गर्न सकिने भएकोले इन्टेलिजेन्स नेटवर्कलाई प्रभावकारी बनाउनु पर्नेमा समेत जोड दिनु भयो । उक्त कार्यशालामा आयोजक राष्ट्र चीनका एक्जक्युटिभ भाइस मिनिस्टर वाङ झियाओहोङ, संयुक्त राष्ट्रसंघका उप महासचिव जं पियर लाक्वा, युएन पुलिस एडभाइजर लुइस कारिल्हो लगायत अन्य उच्च अधिकारीका साथै फ्रान्स¸ जर्मनी¸ अर्जेन्टिना¸ बंगलादेश¸ पाकिस्तान सहित संयुक्त राष्ट्रसंघीय शान्ति स्थापनामा सहभागी भएर योगदान पुर्याउने विभिन्न देशका उच्च अधिकारीहरुको सहभागिता रहेको उक्त कार्यक्रममा महानिरीक्षक खनाल सहित जम्मा ६ जना उद्घाटन सत्रको प्रमुख वक्ता (Keynote Speaker) को रुपमा रहनु भएको थियो।