काठमाडौं,
    सुनसरी जिल्लाको भोक्राहा नर्सिङ्ग गाँउपालिका ६ स्थित पूर्व–पश्चिम लोकमार्गमा पर्ने तिरौलिचोकबाट बैशाख १६ गते एपीएफ टोलीले करीब ६ लाख रुपैयाँ बराबरको चोरीपैठारीको मकै पिस्ने थ्रेसर मेसिन बरामद गरेको छ । 
    सशस्त्र प्रहरी बल, नेपाल गण हेक्वा सुनसरी नम्बर ४ गणबाट खटिएको एपीएफ टोलीले उक्त मेसिन बरामद गरेको हो । 
    भारतबाट अवैध रुपले भन्सार छली ट्रयाक्टरले तानेर नेपालतर्फ लाउँदै गरेको अवस्थामा उक्त मेसिन बरामद गरिएको हो । 
    बरामद मेसिन आवश्यक कारवाहीको लागि स्थानीय भन्सार कार्यालयमा बुझाइएको छ । 
    यसैगरी कञ्चनपुर जिल्लाको शुक्लाफाटा नगरपालिका ११ कलुवापुरबाट बैशाख १६ गते एपीएफ टोलीले करीब २ लाख ५० हजार रुपैयाँ बराबरको मोबाईल सेट बरामद गरेको छ । 
    सशस्त्र प्रहरी बल, नेपाल गण हेक्वा कञ्चनपुर नम्बर ३५ गणबाट खटिएको एपीएफ टोलीले उल्लेखित मूल्य बराबरको ५८ वटा मोबाईल सेट वेवारिसे अवस्थामा बरामद गरेको हो ।